يوم وطني وتاريخي

اليوم اتمتع بيوم تاريخي هو فوزي في داس شطرنج على محترف شطرنج صارله يغلبني اسبوع ..الرجل متمرس بيها من ايام شبابه اللي كضاها بالكاظمية واتمرس عالخطط والاساليب الهجومية...

مونديالووووف 2

قبل بداية المونديال تجرأت ووضعت توقعاتي ...بس نسيت انه هذا مونديال..يعني لو صدقت توقعاتنا ماراح يصير مونديال مثير ويخطف الانظار ويدوخ المحللين....سقوط ايطاليا الفظيع والخروج الفرنسي الفضائحي وتاهل اليابان وكوريا الجنوبية
هم زين توقعاتنا كانت خطأ !!!
بس لاحظ انه انا قلت مستوى جيد من اسيا
وقلت ان مستوى فرنسا غامض واتوقعت غانا مستوى طيب واتوقعت شيلي تصعدوالباراغواي يعني( ما صخمتها كلش بالتوقعات!!!!)

مدون سابق

كان جدي مدون في عصر ماقبل النت ..مولغز هذا..كان يدون يومياته على مفكرة ايام وبعد وفاته <ربي يرحمه> ترك مجموعة مايقارب 5 سنوات من التدوين ..زارني اليوم فلان ونجح اليوم علان وعيد ميلاد فلانة اليوم..اعتقد والله اعلم ان جينات التدوين انتقلت عندي ولكن بصورة عصرية
مو لو مو مو!!!

مونديالووووف

في اجواء المونديال احنا وبعد متابعة التقارير عنها احب اقول شي ياجماعة....قناة الجزيرة الرياضية ممتازة في النقل والتغطية افضل بمراحل من الاي ار تي في 2006 واحب اقول ان هذي الايام جميلة والاثارة تكون كبيرة في دور ال16وتتصاعد تدريجيا ..هل تتذكرون هدف مارادونا في مرمى انكلترا 1986راوغ من منتصف الملعب حتى المرمى..المهم شفت هدف يشبهه 80% سجله ليونيل ميسي في اسبانيا..مارادونا في تصريح مثير انه سيرقص عاريا لوالارجنتين فازت بكاس العالم..وهو يدرب الان..لاتفهموني غلط انا مااشجع الارجنتين بس هي هاي اجواء المونديال السحرية..بالمناسبة لو فازت البرازيل بيها راح تكون نهاية بايخة..اشجع اي فريق لم يفز بها من قبل..اسبانيا هولندا فريق اسيوي او افريقي ليش لا..تركياوكوريا وصلوا في 2002 لكن المانيا والبرازيل احتكروها بتعبهم وجهدهم طبعا

مدرب البرازيل استبعد ادريانو ورونالدينيو من المنتخب اكو صديق راح يضوج من هالخبر

المزيد عن العدالة

وانا داتفرج على حفلة تكريم لاعمال شهر رمضان 2009 في احدى القنوات شفت تكريم لبنات وابناء الفنانين يعني مثلا بنت نورالشريف اخذت تكريم عن ثاني عمل درامي لها..بعدها توها بدت تمثل ياجماعة...والحق يقال ان جيل الثمانينات شهد ثورة مصرية فنية كبرى كانت عصرا ذهبيا...وجيل التسعينات الفن نزل خطوة...هالجيل الآن وللاسف نزل خطوات..الان جيل شباب وتكريم شباب مع نكران جميل واضح لفنانين السابقين يعني جميل راتب وسناء جميل وعادل ادهم والكثيرين تنكرت مصر لجميلهم وحتى التكريم مااجاهم
اسمعيل يس مات فقير ياجماعة...اسامة عكاشة قبل جم يوم نوموه بمستشفى حكومية متواضعة بينما الوزراء علاجهم باوربا
هالجيل يمثل الجيل الخشبي مو الذهبي
ومصر بدات تبخل بانجاب الفنانين الكبار واوضح انها تبخل لكنها لم تصبح عقيمابعد

شمعة

الشهد والدموع..الراية البيضا...ليالي الحلمية...زيزينيا ....الحب واشياء اخرى...المصراوية....ارابيسك...ابو العلا البشري..
اعمال درامية ما ننساها وما ننسى صاحبها اسامة انور عكاشة واللي بخلت مصر على علاجه وتوفى متاثرا بمرضه في احد مستشفياتها المتواضعة...كان اسامة عقلية ممتازة وكان ذلك واضحا في اعماله الجميلة التي الفها
كانت الاعمال هذه من قصصه وحواراتها من تاليفه ايضا
انها شمعة اخرى تنطفأ

احتراماتي وتوقعاتي

احتراماتي للفرق الكروية التالية التي لم تتاهل لكاس العالم ولكن تحتفظ بمكانتها المحترمة
التشيك روسيا تركيا السويد العراق السعودية مصر اوزبكستان ايران
اتذكر الفريق الوحيد الذي غلب استراليا في تصفياتها:العراق
حتى اليابان تعادلت وياها في طوكيو والمدرب فيربيك يومها اعترف ان اللاعبين العراقيين كانوا اذكياء
هالمرة اتوقع مفاجات بكاس العالم اتوقع مارادونا مع فريقه يصعد لادوار متقدمة بس يطلع رغم ضعف قدرته التدريبية
البرازيل نفس الشي مااتصور هم صعب واحد يغلبهم
اسبانيا ممكن توصل ايطاليا ممكن استراليا ممكن المانيا ممكن صربيا ممكن اذا مواستراليا
اتوقع الجزائر ممكن توصل دور ثاني اتمنى..مصر مكانها خالي
فرنسا منتخب غامض ماتعرف مستواه ومن اسيا اتوقع مستوى جيد من اليابان وكوريا الجنوبية
مستوى امريكا اسوأ من امريكا 2002 جانوا وقتها ممتازين..البرتغال ماتوصل للاربع مراكز الاولى اوكي المباريات الاولية راح تخلي الواحد يكشف مستويات الفرق ..البرازيل ينقصها الثقة بالنفس..انكلترا مستواها افضل من قبل ..مهاجمين المانيا بخير..اسبانيا فازت بصعوبة عالسعودية 3-2 وديا اكو خلل بالدفاع..ايطاليا والكاميرون تعادلو سلبيا اكو خلل بالتهديف
امريكا خلل بالثقة بالنفس لكن عدهم لياقة بدنية خرافية وارادة خسروا شوط مع تركيا لكن لياقة تركيا بالثاني قلت فخسروا2-1
من افريقيا اتوقع منتخب الكوت ديفوار يتاهل دور ثاني او يترك اثر طيب ايضا غانا
المجموعة الاولى فرنسا والاوروغواي والمكسيك والبلد المضيف اتوقع فرنسا توصل والثاني يخسر بدور 16
الثانية الارجنتين اليونان نيجيريا جنوب كوريا اليونان تخسر اتوقع تبقى بين نيجريا وكوريا
الثالثة الجزائر امريكا سلوفينيا انكلترا لازم الجزائر تتجاوز امريكا وسلوفينيا good luck
الرابعة استراليا المانيا غانا صربيا ماتنعرف مستويات متقاربة عدا المانيا اكيد توصل
الخامسة الكاميرون الدنمارك هولندا اليابان خليها سكته ...الله يسترعليها مجموعة لوووز
السادسة ايطاليا نيوزلنده سلوفاكيا باراغواي عدا ايطاليا مستويات متقاربة باراغواي اقوى شوية
السابعة البرازيل البرتغال كوت ديفوار وكوريا الشمالية اللي اكيد تخسر يبقى بين البرتغال وكوت ديفوار والبرازيل
والمفاجاة انه ممكن البرازيل ماتوصل وممكن توصل
الثامنة تشيلي هندوراس اسبانيا سويسرا وهي بين تشيلي وسويسرا واتوقع تشيلي تصعد

العدالة

وسط مباريات كرة القدم الودية وفي اجواء ماقبل مونديال افريقيا...جتني هاي الملاحظات؟
ملاحظة1:هل فد يوم باوعت عالمنتخبات المشاركة من كل قارة..خليني اخدمكم واذكرلكم انه من اوروبا 13منتخب من امريكا الشمالية والجنوبية 8 منتخبات من آسيا وافريقيا كل واحد 5فرق زين انت عندك خريطة او اطلس حتى تشوف حجم افريقيا وتقارنها بحجم قارة اوربا زين عوفك من حجم دولة روسيا الفظيع وقارن..افريقيا اكبر حجم و5 فرق بس دايما تترشح واوربا 13 !!!
زين آآآآآسيا...التعليق الكم!!
ملاحظة2:(او كفخة2) هل تدري اغاتي انه اول مرة قارة افريقيا تستضيف كاس عالم...صارت زحمة من اتحاد الدولي قبل ينطيها لافريقيا
ملاحظة 3:هل لاحظت انه امريكا الشمالية دايما مكسيك وامريكا والجنوبية هالمرة باراغواي واوروغواي حتى ملينا
ملاحظة 4:هل تعرف ان الاتحاد الاسيوي ضافوا استراليا علينا واخذت وحدة من مقاعد اسيا.. اني لو منهم جان ضفتهم ويا امريكا الجنوبية والشمالية
ملاحظة 5:شايفين تصفيات اسيا جم مرحلة ومباراة المنتخب ينرادله يلعب بيها تقريبا 15-18 مباراة حتى يتاهل والمنتخب الامريكي او الاوربي المدلل يلعبله فد 8 مباريات وعنده مقاعد اكثر
ملاحظة 6: شلون الفيفا ينامون مرتاحي الضمير

اللحمة العراقية تواجه المخاطر

اقرأ صحيفة او جريدة يوميا وبينما اقلب الخبر بعد الخبر مثل الراتب التقاعدي لمعالي رئيس الوزراء والكفخات على راس مدير عام خطوطنا الجوية من اختنا الكويت ما اخذ الاهتمام المطلق مني غير خبر تراجيدي كلش كلش لهذا حضروا الكلينكس مالتك اذا جنت تشاطرني القهر ...خبر احتلال الحمى النزفية لاغلى ثروة وطنية النا ...اللحم العراقي
اقروا الخبر http:// www.alaalem.com./index.php??aa=news&id22=9724
نظرة الى الكرش اللي اربيه ونظرة للجريدة ...ومشهد درامي ناقصتها الدمعة
احلى شي: ماسامع عن لحم بعجين بالدجاج؟الله يستر على لحمنا الغالي على كلبي وكلوب العراقيين ,,اللي طالع للخارج يعرف قيمة اللحم مالتنا مو لو مو مو؟هسة تلكى الاغنام والابقار مالتنا لابسة قناع للوقاية هههههههه

الصــحــــافة العـــربيـــــــــــة وملـــكة جمـــــــال امـــــريكا

اول ماتم انتخابها ملكة صرحت اسرائيــــــل بأنها على علاقة بحزب الله وهذي الخباثات الاسرائيــــلية متعودين عليها لكـــــن الصحـــافة العربيــــــة اضـــافت لمسة مضحــــكة على القصـة حيث نفش الصحفيون ريشهم وتفاخروا بالانجاز العربي المـــــــــــذهل,اقرئوا اذا اردتم
والآن ملكة الجمـــــــــال..... http://www.alarabiya.net/views/2010/05/20/109092.html
اصبحوا يفخرون باجساد بناتنا العاريات وعلى حد تعبير الرئيس اللبناني الصورة المشرفة للتالق اللبناني
عاش التالق اللبناني

ملكة جمــــــــــــال امريكا لبنانية الاصل

شوف البنية شكلها عربي بس دمها وروحها .............
اذا عرفتو انه كادت ماتفوز بيها لانه شكوا بيها معرية نفسها بحفلة تعري اذاعة ديترويت ودافعت عن نفسها انها جانت مجرد......
لابسة ملابس فاضحة
شعلية آني واحد فقييييييييييييييير

افــــــلام 2009

هذه مجموعة الدرجات التقييمية ل80% من افلام السنة الماضية اضعها هنا للفائدة
مال كيت ونسليت The reader 7/10
مال بطل جيمس بوند فلم عن اليهود في زمن النازية Defiance 8/10
Paul Blart Mall Cop 5/10شرطي المول
Ink heart 6/10فلم خيال علمي
Taken 8/10ليام نيسون يستحق المشاهدة
Watchmen 7/10 خيال علمي جيد احسن من الي كبله
Race To Witch Mountain 7/10خيال علمي جيد
Duplicity 8/10 فلم للاذكياء
Fired Up 7/10 شبابي
Adventureland 5/10 همينه
Monsters vs Aliens 7/10 كرتوني بس يفرق
Fast and Furious 4 8/10 فين ديزل ديبدع
Dragonball 5/10 لاتكلف نفسك
State of Play 8/10 ممثلين كبار وقصة روعة
Wolverine 8/10 اكشن ممتاااااااز
لابأس بيه Star Trek 7/10
Angels And Demons 6/10لابأس بيه مومثل الجزء الاول الي جان افضل
Night At The Museum 2 7/10 والله مو مثل الاول بس يونس
Up 7/10 جيد وموسيقى روعة كرتوني ترشح للاوسكار ب3 مجالات منها افضل فلم ماكو كرتون نافس هيج
Land of the Lost 5/10 مايستاهلل تشوفه
The Proposal 8/10 سندرا بولوك وما ادراك من هي كوميدي رومانس حلووووو
Transformers 2 8/10 لازم تشوفوه
Hurt Locker 8/10 همينه لازم
Ice Age 3 7/10 ممتاز
The Ugly Truth 8/10 لازم تشوف بطلة كرايز اناتومي
GI Joe 7/10 اكشن جديد
District 9 6/10 ميستاهل كلش
Spread 7/10 فلم للكبار18سنة
Inglourious Basterds 8/10 لازم تشوفوه
Final Destination 4 7/10 شبابي
Extract 6/10 كوميديا
Gamer 6/10 ميستاهل
Cloudy with a Chance of Meatballs 7/10 حلو
Jennifer's Body 6/10 ميستاهل
Love Happens 7/10 جنفر انستون
The Informant 7/10 قصة حقيقية
Surrogates 7/10 بروس ويلليس
Invention of Lying 6/10 ميستاهل
St. Trinian 6/10 للمراهقين
Zombieland 7/10
An Education 6/10 فلم هادئ
Couples Retreat 6/10 للصيف
Law Abiding Citizen 8/10 فلم رائع
Amelia 7/10 قصة الجرأة
Motherhood 7/10 للامهات
A Christmas Carol 8/10 الفه شارلز ديكنز كلش حلو
Men Who Stare At Goats 5/10
Precious 7/10 البطلتين رشحوا للاوسكار وحدة منهم فازت بيها
لازم تشوفوهG 2012 8/10
Fantastic Mr Fox 8/10 كرتوني بس مو اي شي جورج كلوني
Bad Lieutenant 7/10 حلو للكبار
The Blind Side 8/10 لازم
Ninja Assassin 7/10 اكشن الممثل والقصة احسن من اداء جاكيشان الحالي
Everybody's Fine 7/10 روبرت دنيرو اب يعرف اولاده
Up in the Air 7/10 ترشح للاوسكار منه 3 واحد منهم فاز
Crazy Heart 7/10 فلم افضل ممثل
Invictus 8/10 فلم لازم تشوفوه بلدهم نفس طبيعة سكان بلدنا
The Princess and the Frog 6/10 ميستاهل
Avatar 8/10 جيد
Hachiko A Dog Story 8/10 لازم تشوفون القصة الحقيقية هاذي
It's complicated 8/10 ممثلين كبار والفلم اجتماعي كوميدي
Sherlock Holmes 8/10 لازم تشوفوه
Case 39 7/10 من زمان رينيه زيلويغر مامثلت هيج فلم جيد بس شكلها شوية متغير الفلم غامض
اكو ملحق لهاي القائمة عالتساهيل ادونها اتمنى ذوقي يعجب واذا ماعجب بعد انتو احراااااااررررر

مسلسل BURN NOTICE

هذا مسلسل عن شخصية يقوم بمهمات تجسسية محلية وماتتطلبه من اقتحام مباني وسرقة مستندات واي شي علمود المهمة

تكولولي شنو الجديد بيه

اكول بيه جديد بس اشرب جايك اغاتي لا يبرد وجايتك السالفة

الجديد انه يشرح كل خطوات المهمة مالته وشلون وليش يسويها والادوات اللي يستعملها وكافة الملاعيب

انتاجه 2007 Jeffrey Donovan بطلها اللي شارك همينه بفلم انجلينا جولي CHANGELING

سولف ويا طفلك

نوبات يويو(ابني يوسف) يلغمط ويشخبط ويحاول يبدي يحجي الحلو انه بديت اجاوبه حتى يشعر الطفل باحترامك وتعزز ثقته بنفسه

وهو اسلوب زين بالتربية حسب ما اعتقد واليكم جزء من الدايلوك اليومي:

يويو:بابا دغدغدغدغدغد هايدهايينبها

انا:ليييش

يويو:شوثي ثو بانادقادقادقا

انا: لا والله وبعدين شصار

يويو:دويببا نرماتا مشو ببيم

انا: ها افتهمت لعد

فضفوضة صغيرة

هلو....كوني موظف بالصحة و دخل علينا اختراع ضوجنا اسمه جهاز البصمة (للي مايعرف تعريف جهازالبصمة :عندما تروح للدوام ساعة 8 تعرض اصبعك على هذا الجهاز ليعترف بك مداوما وفي نهاية الدوام ساعة 3 نفس العملية ولا يمكن التحايل عليه لانه مربوط بتوقيت زمني للبصمة والبيانات ترسل للدائرة الرسمية نهاية كل شهر) فدأحجي مع صديقي الشرطي وبس كلتله عندنا بصمة حتى انهالت علي امطار الشماتة والسخرية والله شنو موظفين مخابرات لو بالبنك الدولي؟!!!!!

رباط الحجي انه حتى الشرطة ورجال الامن عدنا ما عدهم هذا الاختراع المنعول والديه بس لموظفي الصحة وتم استثناء الدكاترة والمدراء منه بحيث ما يتحاسبون عليه وهذا الاختراع المشعول اهله بدا اول ما بدا ورياح التفرقة الوظيفية تلعب بكدلته

آآآآآه يا زمـــــــــــــــــــــــــــن